БИШКЕК, 27-фев. — Sputnik. Таңда Кыргызстанда эки ирет жер титиреп, күчү алты баллга жакын болду. Бул тууралуу Сейсмология институту кабарлады.
Жер биринчи ирет саат 03:42де (5.1 балл), экинчи жолу 05:58де (5.6 балл) силкинген.
Анын күчү эпиборборунда 6 баллга (магнитудасы 5.6) чукулдап, очогу Кыргызстан менен Кытайдын чек арасындагы Какшаал тоолорунда болгон.
Бул Ысык-Көл облусундагы Таш-Короо айылынан түштүк-чыгышты карай 50, Эчкилүү-Таштан 55, Кургак айылынан 58, Эңилчек, Кең-Суудан 60, Каракол шаарынан түштүк-чыгышты карай 130 чакырым аралыкта экени айтылды.
Жердин силкинүү күчү Таш-Короо, Кургак, Эңилчек айылдарында 4, ал эми Эчкилүү-Таш, Кең-Сууда 3.5 балл болгон.