БИШКЕК, 26-фев. — Sputnik. Гипертония оорусуна чалдыгууну алдын алуу боюнча бир нече кеп-кеңешти Республикалык ден соолукту чыңдоо борборунун адистери "Сак-саламат" Telegram каналы аркылуу айтып беришти.
Гипертония — артериялык кан басымдын 140/90 мм. сымап мамычасынын (сым. мам.) узакка жана туруктуу жогорулашынан улам пайда болуучу жүрөк-кан тамыр системасынын өнөкөт илдети.
"Көп учурда гипертония оорусу 55 жаштан жогорку курактагы адамдарда пайда болот, ал эми акыркы кезде бул оору андан дагы жаш курактарда кездешүүдө", — деп айтылган кеңеште.
Сергек жашоо мүнөзү жана туура тамактануу дени сак жүрүүгө жардам берерин эскертишти.
Адистер төмөнкү эрежелерди сактоо керектигин айтышты:
Артериялык кан басымга көзөмөл кылып туруу. Нормада болгон АКБ 140/90 мм. сым. мам. жогору болбошу керек;
ашыкча килограммдардан арылып, адам өзүнүн салмагына көз салып жүрүшү кажет;
тузду колдонууну күнүнө 5 граммга чейин чектөө жана тамакты тузун кем кылып жасоо;
майлуу тамакты азайтуу;
жашылча-жемишти көбүрөөк, суткасына 400 граммдан кем эмес өлчөмдө жеген жакшы;
чылым чегүүдөн жана алкоголь ичимдигин ашыкча ичүүдөн баш тартуу;
жайдары, сабырдуу болуу, стресске кабылбоого аракет кылган оң;
күн сайын 30-40 мүнөт кем эмес кыймылдап, зарыл болгон көнүгүүлөрдү жасоо керек.
