БИШКЕК, 20-фев. — Sputnik. Президент Садыр Жапаров мурдагы эл башчыларын бир столго чогултууда кайсы бирин мыйзам жоопкерчилигинен бошотуп, аларды өлкөгө кайтарып келүү жөнүндө сөз айтылган жок. Бул тууралуу президенттин маалымат кызматынын жетекчиси Дайыр Орунбеков билдирди.
"Президент экс-президенттер менен болгон жолугушуусу тууралуу жазган билдирүүсүнөн кийин социалдык тармакта талкуулар жаралды. Мындай күтүүсүз кабар көпчүлүккө жагымдуу болду, кубануу менен талкуулап жатканын байкап жатабыз. Бирок саналуу топ тарабынан талаш-тартыштар жаралып, негизсиз тыянак чыгаруулар орун алып жатканын көрүп жатабыз", — деп эсептейт Орунбеков.
Ошондой эле ал Жапаров өткөн-кеткенге кылчайбай, мамлекет башчысы катары тарых алдында жана келечек муун алдында өз вазыйпасын аткарганын белгиледи.
"Мындан кыйкым издеп, президенттин элди ынтымакка чакырган ниетин кайра тескери жакка буруп, ич ара бөлүнүп-жарылып, тирешти ого бетер козутпайлы. Мамлекет башчынын жакшы ниетин колдогондун ордуна, кайра аркы же берки өйүз болуп, акыйнек айтышып отурганыбыздын өзү тарыхы бай, айкөл эл катары, улут катары бизди кооздобойт. Ооба, Кыргызстанды башкарып кеткен ар бир президенттин жакшы да жактары, кемчиликтерди да болду. Баары мамлекет жана эл үчүн иштешти, аракет кылышты. Ошону менен катары каталарды да кетиришти. Ал эми азыр анын баары тарых. Ким кандай ката кетиргенин баарыбыз жакшы билебиз. Ошентсе да "өткөн-кеткенге кылчактап, таарынычтарды ортого салып отура берсек келечек болбойт, алдыга жылалы" деген жакшы ой саясаттагы негизги приоритеттүү багыты. Ал же бул саясатчынын тарапташымын дегендердин баарын сабырдуулукка чакырабыз, ынтымакта бололу. Бири-бириңиздердин көңүлдү оорутуп, кайым айтышууну улантпаңыздар, токтотуңуздар", — деп жазды маалымат кызматтын жетекчиси.
Орунбековдун айтымында, кыргызстандыктар бир атадан тараган, бир мамлекеттин уул-кыздары, ич ара душмандашкандан Кудай сактасын.
Белгилей кетсек, 18-февралда Садыр Жапаров мурдагы президенттерди бир дасторконго чогултканын, алар бири-бирин кечиришкенин маалымдаган. Жолугушуу БАЭнин Дубай шаарында өткөн. Бул окуя коомчулукта ача пикирлерди жаратып, түрдүү сындар да айтылган.
Кийинчерээк Алмазбек Атамбаев да пикирин билдирип, аны Жапаров менен Ташиев мурдагы таарынычтарды унутуп, сүйлөшүү үчүн жолугушууга чакырганынан барып калганын айткан. Экс-президенттердин чогуларынан кабардар болбогонун, мындан улам аягына чейин отурбай чыгып кеткенин белгиледи. Ал эми Аскар Акаев баарын чогултуу демилгесин кубануу менен кабыл алганын билдирди.