БИШКЕК, 19-фев. — Sputnik. Крымды Киев үчүн мыйзамдуу аскерий бута катары айтылган сөздөр АКШ менен Россиянын ортосундагы карама-каршылыктын тереңдигин, ошондой эле Вашингтондун эл аралык чыңалуунун башкы чагымчысы катары ролун ачык көрсөтөт. Бул тууралуу Россия президентинин маалымат катчысы Дмитрий Песков "Москва. Кремль. Путин" берүүсүндөгү маегинде айтты. Программадан үзүндүнү Павел Зарубин өзүнүн Telegram каналына жарыялаган.
Буга чейин АКШнын мамлекеттик катчысынын саясий маселелер боюнча орун басары Виктория Нуланд Вашингтон Киевдин Крымдагы аскерий объектилерге сокку уруусун колдой турганын айтып, аларды “мыйзамдуу бута” деп атаган. Ал ошондой эле Крым "жок дегенде демилитаризацияланбаса" Украина коопсуз болбой турганын баса белгилеген.
"Бул дагы бир жолу биздин пикир келишпестиктерибиздин тереңдигин ачыктайт, керек болсо АКШнын орун алып жаткан эл аралык чыңалуунун негизги чагымчысы катары ролун баса белгилейт. Нуланд айым Америка саясатынын эң агрессивдүү шылуундарынын чоң лагерине кирет", — деди Песков.
Тарых
Крым 2014-жылдын мартында Украинадагы төңкөрүштөн кийин өткөн референдумдан соң Россиянын аймагына айланган. Референдумда Крымда шайлоочулардын 96,77 пайызы, Севастополдо 95,6 пайызы Россияга кошулууну колдошкон. Украина дагы эле Крымды өзүнүн убактылуу оккупацияланган аймагы деп эсептейт, бул маселеде көптөгөн батыш өлкөлөрү Киев тарапта.