БИШКЕК, 17-фев. — Sputnik. Электрондук товардык-транспорттук коштомо кагазды (ЭТТК) колдонбогондорго жыл соңуна чейин айып салынбай турган болду. Бул туурасында Салык кызматы билдирди.
Аталган органдын төрагасы Алтынбек Абдувапов ЭТТК колдонуу маселеси боюнча бизнес өкүлдөрү менен чай үстүндө жолугушуу уюштурган. Талкуунун жүрүшүндө Салык кызматы ЭТТК системасын киргизүүгө карата ишкерлердин реакциясына мониторинг жүргүзөрүн жана бизнеске ыңгайлуу болуш үчүн аны жакшыртуунун үстүндө иштеп жаткандыгын белгилеген.
"Салык жол-жоболорун санариптештирүү компоненттерин киргизүүнүн түпкү максаты — салыктык башкарууну модернизациялоо гана эмес, биздин ишкерлерге жагымдуу шарттарды түзүү. Ар бир салык төлөөчүнүн ыңгайлуу иштеши, салык төлөө жана отчет берүү ыкмаларынын жөнөкөй болушуна багытталган. Бул үчүн бардык кызматтарды электрондук форматка өткөрүп жатабыз. ЭТТКны колдонууда ишкерлерде пайда болгон кыйынчылыктарды эске алуу менен быйыл айып санкциялары колдонулбайт. Бул системага жеңил өтүүгө мүмкүндүк берет", — деди Абдувапов.
Ошондой эле ал Электрондук товардык-транспорттук коштомо кагаз мамлекетке гана эмес, бизнеске да керектигин белгилеген.
"Муну жакынкы күндөрү өзүңөр байкайсыңар. Кээ бирөөлөр ачык-айкын иштегиси келбегендиктен нааразылыктарын билдирип, коомчулукка туура эмес маалымат берип, товарлардын кымбатташынан коркуп жатышат. Алар менен да түшүндүрүү иштери жүрүүдө", – деди Салык кызматынын төрагасы.
Эскерте кетсек, 2022-жылдын 15-майынан бери мунайзаттарды жана товарларды жүгүртүүчү, 1-июлдан тарта Евразия экономикалык комиссиясы тарабынан бекитилген тизмеге киргизилген товарларды жүгүртүү менен алектенген ишкерлер ЭТТКны колдонушууда. Ал эми 1-январдан тартып товар жүгүртүү менен алектенген ишкерлердин баарына милдеттендирилген.
Бүгүнкү күндө 55 миңден ашык ишкер Салык кызматынын маалыматтык системасына катталып, электрондук товардык-транспорттук коштомо кагазды колдонушууда.