БИШКЕК, 16-фев. — Sputnik. Түркиянын зилзала болгон жерине барган саламаттыкты сактоо министри урандылардын жанында медиктер менен сүйлөшүп турганда бут алдынан жарылуу жаңырган.
Бул туурасында Sputnik Түркия өзүнүн Telegram-каналына жазды.
"Саламаттыкты сактоо министри Фахреттин Кожа медицина кызматкерлери менен сүйлөшүп турганда мештеги көмүр жарылып кеткен", — деп айтылат маалыматта.
AHaber телеканалынын билдиргенине караганда, министр жабыркаган эмес.
2023-жылдын 6-февралында магнитудасы 7,7 жана 7,6 болгон зилзала эки ирет тогуз саат аралык менен Түркиянын түштүк-чыгышында болгон. Түркия лидери Режеп Тайип Эрдогандын айтымында, бул 1939-жылдан берки эң катуу зилзала болду. Соңку маалыматтар боюнча, жаратылыштын бул кырсыгынан 35 миңден ашуун киши каза тапты.