БИШКЕК, 9-фев. — Sputnik. Баалулуктар алмашып, түпкү тамырыбызды унутуп баратабыз. Мындай пикирин депутат Карим Ханджеза парламентте билдирди.
Анын айтымында, коомду, өзгөчө жаш муунду идеологиялык, руханий жактан тарбиялоо, ошондой эле кыргыз тилинин макамын жогорулатуу курч көйгөй бойдон калууда.
"Тилекке каршы, мекенге болгон сүйүү күндөн-күнгө алсыздап бара жатат. Мамлекет тарбиялоо функциясын унутуп калган сыяктанат. Ооба, патриоттуулуктун, руханий байлыктын негизинде курсагыӊ тойбойт, бирок коомдун моралдык жакырчылыгынын айынан коррупция, байлар менен кедейлердин ортосундагы айырмачылык, педофилдик көбөйөт. Жаштар арасында руханий өнүгүүгө умтулуу, улууларга сый-урмат көрсөтүү, ата мекенди сүйүү, барктоо, айлана-чөйрөгө аяр мамиле кылуу түшүнүгүн жайылтуу аксап жатат", — деди Ханджеза.
Ошондой эле депутат жаштардын өзүнүн өмүрүнө кол салуусу катардагы көрүнүш катары кабыл алынып калганына кейиди. Ал эми өнүгүү багытындагы илим-билим, искусство жана спортко болгон кызыгуусу жоголууда деп эсептейт.
"Көбүнчө жаштар блогер болууну, тез аранын ичинде баюуну самап Tik-Tok, Instagram аркылуу хайп кылууга өтүп алышты. Жогоруда аталгандын баары идеологияга, патриоттулукка тарбиялоо, билим берүү жаатындагы мамлекеттик саясаттын алсыздыгынан келип чыгып жатат. Биз балдарыбыздын акылын жоготуудабыз, тийиштүү көӊүл бурулбай жатат. Ар бир билим берүү мекемесине идеологиялык тарбия сабактарын киргизүү зарыл, ал жерде гимн, желек, салт, тарыхыбыз жана баалуулуктарыбыз негизги бөлүгү болуусу кажет. Бирок анын баары таӊуулоо иретинде болбошу керек. Ошондой эле башка аянтчаларды да түзүү мезгилдин талабы. Мисалы, Дүйнөлүк көчмөндөр оюндарын өткөрүүдө жаштардын патриоттук сезимдери жогорку деӊгээлге жеткендигин жакшы билебиз", — деди эл өкүлү.
Ал министрлер кабинетине бул боюнча мамлекеттик саясатты жүргүзүүнү суранды.