БИШКЕК, 7-фев. — Sputnik. Бишкек убактысы боюнча саат 10:00гө карата алынган маалымат боюнча, Түркиядагы жер титирөөнүн кесепетинен каза болгондордун арасында Кыргызстандын жарандары жок, бирок жаракат алгандар бар. Бул туурасында Тышкы иштер министрлиги кабарлады.
Билдирүүгө ылайык, Адана шаарында 39 жаштагы А.Т. аттуу мекендеш ооруканага түшүп, ага керектүү медициналык жардам көрсөтүлгөн. Абалы канааттандырарлык, учурда ооруканадан чыгарылды. Ал эми Антальядагы Башкы консулдуктун кызматкерлери тарабынан Адана шаарындагы 10 кыргызстандыкка азык-түлүк, суу, жылуу кийим жана жууркан түрүндө жардам көрсөтүлүп, ысык тамак берилип, коопсуз жерге жайгаштырылганы белгиленди.
ТИМ жер титирөө болгон Кахраманмараш, Хатай, Османийе, Адыяман, Диярбакыр, Шанлыурфа, Газиантеп, Килис, Адана, Малатья, Газиантеп жана Мерсинде жүргөн кыргызстандыктар дипломатиялык мекемелерге кайрылуу үчүн байланыш номерлерин сунуштады.
Кыргызстандын Түркиядагы элчилиги (Анкара): +90 545 6896800, +90 312 4913506, + 90 312 4913507;
Антальядагы Башкы консулдугу: +90 546 5570471, +90 534 8388551;
Стамбул шаарындагы Башкы консулдугу: +90 535 1077212, +90 212 2356767, +90 212 2353737;
КР Тышкы иштер министрлигинин консулдук департаменти: +996 999 312002.
Эскерте кетсек, кечээ таңда Кахраманмараш провинциясында магнитудасы 7,4кө жеткен жер титирөө катталган. Эпкини коңшу мамлекеттерге да тийип, жер Сириянын Алеппо, Латакия, Хама жана Тартус провинцияларында да силкинген. Зилзаладан ал жакта 2 921 киши көз жумуп, 15 834 адам жаракат алганы айтылды.
Түш ченде жер кайрадан титиреген. Мында магнитудасы 7,6га жетти. Түркиялык сейсмологдордун айтымында, зилзаладан Газиантеп шаары көбүрөөк жабыр тартты.
Андан кийин адистер жер улам силкинип жатканын белгилешкен, ал Ливанда, Ирак, Израиль, Грузия, Абхазияда да байкалып, Сочиге чейин жетти.
Кыргызстан Түркияга жер титирөөнүн кесепетин жоюуга жардамдашуу үчүн 63 куткаруучу жөнөттү.