БИШКЕК, 7-фев. — Sputnik. Борбор калаада синтетикалык баңгизаттарды даярдоо жана сатуу боюнча лаборатория аныкталып, баңгитоптун мүчөлөрү кармалышты. Бул туурасында УКМКнын маалымат кызматынан кабарлашты.
"Козголгон кылмыш иштин алкагында 2023-жылдын 4-февралында аталган баңгитоптун мүчөлөрү, чет элдик жарандар кармалды. Аларды тинтүү учурунда марихуана, "Мефедрон" синтетикалык баңгизатын жасоо үчүн прекурсорлор, тийиштүү приборлор жана аларды даярдоо боюнча нускамалар табылган", — деп айтылган маалыматта.
Ыкчам иликтөө иш-чараларынын жүрүшүндө В.М.В. аттуу чет элдик жаран күнөөсүн мойнуна алып, баңгизат боюнча лабораторияны түзүү аракетин тастыктаган. Андан соң УКМКнын тергөө камак жайынын убактылуу кармоочу жайына киргизилген.
Учурда аталган баңгиканалдын башка катышуучуларын аныктоо боюнча тиешелүү ыкчам тергөө иштери жүрүүдө.
УКМКдан учурда республиканын аймагында синтетикалык баңгизаттарды колдонуунун жана жайылтуунун тенденциясы өскөнү байкалгандыгын, бул улуттук коопсуздукка жана өсүп келе жаткан муундун, жаштардын ден соолугуна коркунуч жаратарын эскерткен.
Аталган комитет бул багытта маалыматтар болсо 0312660475 номерине чалып, билдирүүнү өтүндү.