БИШКЕК, 3-фев. — Sputnik. Кыргызстандын футзал боюнча Суперлигасында (Жогорку лига) чет элдик оюнчулардын саны рекордго жеткенин Кыргызстандын футбол союзу билдирди.
1-февралда трансфердик терезе жабылып, футзалдык клубдар 30 чет элдик оюнчуну каттады. Анын көбү бразилиялыктар, ал жактан 19 оюнчу келген. Россиядан дагы тогуз футболчу келсе, Беларусь менен Ирандан бирден спортчу келген.
Буга чейинки рекорддук көрсөткүч 2017-2018-жылдары катталган. Анда клуб 25 оюнчуну каттаган болчу.
Чемпионаттын регламентине ылайык, клуб төрт легионерди жарыялай алат. Бирок ага ЕАЭБ өлкөлөрүнөн — Россия, Беларусь, Казакстан жана Армениядан келген оюнчулар кирбейт.
2022-2023 Суперлигасы өткөн жылдын октябрь айында башталып, майдын аягына чейин уланат. 14 команда ат салышкан турнир октябрь айынан майга чейин үч этапта өтөт.
Биринчиси — баштапкы баскыч. Анда "А" зонасында сегиз команда, ал эми "Б" зонасында 6 команда беттешти. Тайпалар экиден беттеш өткөрүштү (өз талаасында жана конокто). Экинчи этапка сегиз команда чыккан. Алардын бешөө биринчи зонадан, үчөө экинчи зонадан.
Экинчи этап — буфердик. Бул этапта сегиз команда бир беттештен өткөрөт. Оюндар Бишкек менен Жалал-Абадда февраль ичи өткөрүлөт.
Үчүнчү этап — плей-офф. Бул баскычка төрт команда чыгат. Алар эки жарым финалдык беттеш өткөрүп, анын жеңүүчүлөрү финалга чыгып, май айында өлкө чемпиону аныкталат.