БИШКЕК, 1-фев. — Sputnik. Президент Садыр Жапаров "Кабар" агенттигине маек куруп жатып Автоунаа ээлеринин жарандык-укуктук жоопкерчилигин милдеттүү камсыздандыруу (ОСАГО) боюнча да суроого жооп берген.
ОСАГО жөнүндө мыйзам 2015-жылы кабыл алынган, бирок полиси жокторго айып салуу киргизилген эмес. 2023-жылдан тарта бардык транспорт каражаттарынын айдоочуларына камсыздандыруудан өтүү милдеттендирилип, 1-апрелден тарта полиси жокторго айып салуу каралган. Бирок 26-январда министрлер кабинети ОСАГО мыйзамынын мөөнөтүн узартты. Ага чейин мыйзамдын мөөнөтүн жылдырууну айрым депутаттар да сунуштаган.
Жапаров аталган мыйзам чийки экенин белгиледи.
"Баарын териштирип көрүп, долбоорду жылдырдык. Азыр чийки. Анан да бул долбоорду мамлекет өзү колго алыш керек. Эч кандай жеке жактарга бербеш керек. Эл азыр жеке жактарга ишенбейт. Кайсы бир чиновниктин бизнеси деп түшүнөт. Ошол үчүн эл каршы чыгып жатат. Ошондуктан бул долбоорду өзүм көзөмөлгө алып, бардык жагын бышырып, эл өз эрки менен киргендей кылам. Себеби бул долбоор негизинен элге пайдалуу эле долбоор. Өнүккөн өлкөлөрдүн баарында автомобилдер камсыздандырууда турат. Болгону камсыздандырууну туура, адилеттүү, калыс иштетиш керек. Эрежелерин толук иштеп чыгуу үчүн убакыт керек. Жакшы иштеп кетсе, балким, кийинчерээк жеке жактарга дагы уруксат берсек болот. Элге тандоого мүмкүнчүлүк болот. Атаандаштык болуп турат", — деди Жапаров.