БИШКЕК, 28-янв. — Sputnik. Баланын сабактардан алган бааларына ата-эненин артыкча кийлигишүүсү анын билим алууга ынтызарлыгын жоготуп, кесепетин тийгизиши мүмкүн. Бул боюнча "Вечерняя Москва" басылмасына психиатр Алексей Вилков айтып берди.
Адис бала тарбиялоодо дайыма сын менен мактоо катарлаш жүргөнү маанилүү экендигин белгиледи. Ал эми өспүрүм куракта оң сапаттарына көбүрөөк көңүл буруп, өзүнө бул тууралуу айтып турган жакшы.
"Азаматсың" деп айтып, билим алуу үчүн потенциалы жана шарты бар экендигин билдирип туруу керек. Ошондой эле кайсы бир сабактан аксап жатса, көздөгөнүнө жетпейт калса, кадыресе көрүнүш экенин түшүндүрүңүз. Бул андан ары билимге кызыгуусуна жана кийин начар баа алып калса сизге ачык айтып келүүсүнө жол ачат", — деп түшүндүрдү Вилков.
Баланын калыптанышы үчүн окуусуна гана көңүл буруу жетишсиз. Психиатр ата-энелерге чүрпөсүнүн жашоосундагы бардык тармактарына көз салып, көңүл буруунун зарылдыгына токтолгон. Окуучунун хоббиси, алектенген бир жумушу болгону жакшы, ошондой эле өзүн жалгыз сезбеши үчүн дос, курбулары менен сүйлөшүп, ойногонуна уруксат берүү керек.
"Балдардын жүрүм-туруму негизинен ата-энесинин ага жасаган мамилесине байланыштуу. Эгерде кичинекей чагынан эле катуу кармап, жалаң "беш" алууну талап кылса, дайыма мыкты болуу түшүнүгү калыптанат. Төмөнүрөөк баа алса маанайы түшүп, анысын ата-энесине айткандай коркот", — деген Волков.
Адис ата-эне баланы дайыма идеалдуу болууга тарбиялап, ошону талап кылса, ал чоңойгондо турмуштан, жашоодон көргөн нерселерден көңүлү бат каларын, жан дүйнөсүн көп жабыркаарын кошумчалаган.