БИШКЕК, 25-янв. — Sputnik. Жогорку Кеңештин дагы эки депутаты автоунааларды милдеттүү камсыздандыруу (ОСАГО) тууралуу мыйзамдын аткарылышын жылдырууну сунуштады.
Парламенттин жыйынында эл өкүлү Дастан Бекешев камсыздандыруу керек экенин, бирок 1-апрелге чейин айдоочулардын баары аны алууга жетишпей турганын эскертти.
"1-апрелге чейин жетишүү үчүн күнүнө жок эле дегенде 10 миң автоунааны каттоо керек. Бул 10 миң айдоочу. Компаниялар мындайга даяр эмес. Кийинки жылдын жай же күз айларына жылдырсак кандай болот? Убакыт керек, анын үстүнө апрелден тарта айып пул болот. Министрлер кабинети азыр канча киши камсыздандыруу полисин алып жатканы тууралуу маалымат берсин. Күнүнө 10-15 миң машина каттоодон өтүп жатканынан күмөнүм бар", — деди Бекешев.
Кесиптешин депутат Нуржигит Кадырбеков да колдоду. Ал камсыздандыруучу компаниялардын бардык айдоочуларга полис берүү үчүн техникалык шарты жок экенин белгиледи. Эл өкүлүнүн айтымында, нааразычылык митингдер менен коштолушу мүмкүн.
"Айтып коюш оңой. Бирок ага жетишүү мүмкүн эмес. Анын үстүнө дароо эле бериле калбайт, паспорт, айдоочулук күбөлүк, техпаспорт талап кылынат. Кызыгы — зарылдык жаралган учурда унаа ээсинен ишеним кат талап кылып жатышат. Бирөө Россияда, дагы бирөө оору дегендей. Полисти интернеттен алууга болбойт. Нааразычылыктар, митингдер башталат. Жылдырыш керек, мындан шылуундар да пайдаланып кетиши мүмкүн. Натыйжада кырсык болгон учурда төлөм алуу кыйындайт, керек болсо күнөөлүү болуп чыгышы ыктымал. Же жылдырыш керек, же камсыздандыруу ыктыярдуу болушу зарыл", — деди Кадырбеков.
Эскерте кетсек, буга чейин аталган мыйзамдын мөөнөтүн жылдырууну депутат Тазабек Икрамов да сунуштаган.
1-апрелден тарта камсыздандыруу полиси жок айдоочуларга 3 000 сом өлчөмүндө айып пул салынат.