БИШКЕК, 25-янв. — Sputnik. Германиянын канцлери Олаф Шольц Leopard 2А6 танкаларын Украинага жиберүү чечимин кабыл алганын Spiegel журналы билдирип, маалыматты Sputnik Ближнее зарубежье Telegram каналы жазды.
Басылма Германиянын өкмөтүнө шилтеме кылган.
Кеп танкалардын роталары туурасында жүрүп жатат (НАТОнун стандарттары боюнча, бул ок өтпөс 14 техника).
Журнал согуштук машиналарды бундесвердин гаражында турган жеринен жөнөтөрүн кабарлаган. Маалыматка таянсак, учурда Германияда кубаттуу Leopard 2A6 үлгүсүндөгү бул согуштук техниканын 200 даанасы бар.
"Азыркы замандын талабына төп келген, модернизацияланган Leopard жаңы куралдары, кабатталып жасалган бекемдиги жана маалыматтык заманбап башкаруу системасы менен өзгөчөлөнөт", — деп жазылган анда.
Техниканы Украинага жөнөтүү чечими АКШ президенти Жозеф Байдендин аталган мамлекетке Abrams түрүндөгү америкалык танкаларды берүүгө макул болгонунан кийин кабыл алынганы айтылууда.
Кубаттуу согуштук техниканын Украинага качан жөнөтүлөрү азырынча белгисиз.
Россия өткөн жылдын 24-февралында Украинага атайын операциясын баштаган. Президент Владимир Путин анын максатын "сегиз жылдан бери киевдик режим тарабынан геноцидге жана мазактоого кабылган элди коргоо" деп атаган. Бирок АКШ менен анын НАТО боюнча союздаштары ошондон бери Киевге 10 миллиарддаган долларлык курал жеткирүүдө. Россия Батыш тараптын Украинаны куралдандыруусу орус-украин сүйлөшүүлөрүнүн ийгиликтүү болушуна өбөлгө боло албашын жана мындан негативдүү жыйынтык чыгышы мүмкүн экендигин, Украинага берилген ар бир курал Россия үчүн мыйзамдуу бута болорун айтып келет.