БИШКЕК, 24-янв. — Sputnik. Бишкек шаарында бүгүн Элебаев жана Кулатов көчөлөрүнүн кесилишинде жайгашкан көп кабаттуу үйдүн чатырынан чыккан өрт толугу менен өчүрүлдү. Бул тууралуу ӨКМдин маалымат кызматынан кабаралашты.
Тилсиз жоону басууга саат 12:25те өрт өчүрүүчү алты бригада чыгып кеткен.
"Өрт саат 14:55те чектөөгө алынып, толук саат 17:13тө өчүрүлдү. Алдын ала маалымат боюнча, өрт жайылган жалпы аянт 540 чарчы метрди түздү", — деп айтылат маалыматта.
ӨКМ тилсиз жоодон жабыркагандар жок экендигин билдирди.
Учурда тиешелүү тараптар өрттүн эмнеден келип чыккандыгын тактап жатканын кошумчалады.