БИШКЕК, 20-янв. — Sputnik. Өзгөчө ири өлчөмдөгү алдамчылык үчүн ИИМдин Интерпол Улуттук борбордук бюросу издеп жаткан Металлист каймана аты бар Данияр Ибраев Болгариядан кармалды. Бул туурасында ИИМдин маалымат кызматынан кабарлашты.
Эске салсак, ал — ЖКнын мурдагы депутаты Самат Ибраевдин баласы. ИИМ былтыр сентябрь айында анын издөөдө экенин кабарлаган.
2019-жылдын декабрында Бишкек шаарынын ички иштер башкы башкармалыгы алдамчылык кылган Данияр Ибраевге издөө салган. Ал ири курулуш компанияларынын жетекчилеринин ишенимине кирип, курулуш объектилерине материалдарды ташып берүүнү убадалап 19 821 000 доллар алганы айтылган.
Акчаны алган соң Ибраев из жашырып, Кыргызстандын чек арасынан "Ак-Жол" көзөмөл-өткөрүү пункту аркылуу Казакстандын аймагына өтүп кеткени маалымдалган.
2020-жылдын февралында ага Интерпол аркылуу эл аралык издөө жарыяланган. 2020-жылдын 27-февралында аны Болгариядагы София шаарынан Интерпол Улуттук борбордук бюросу кармап, камакка алган.
"Бирок Ибраев адам укуктары боюнча Европалык сотко, андан сырткары, Болгариянын компетенттүү органдарына кайрылып, адам укуктарын коргой турган өлкөнү издеп жүргөнүн билдирген. Коргоо тарап экстрадициялоо боюнча чечимге арызданышкан. Апелляциялык сот үй камагына алуу түрүндөгү бөгөт чарасын тандаган", — деп айтылат маалыматта.
2022-жылдын май айында Болгариянын Варна шаарынын райондук сотунун чечими менен Ибраевге эч жакка чыкпоо жөнүндөгү бөгөт чарасы камакка алуу менен алмаштырылган. Бирок анын кайда жүргөндүгү белгисиз болгон.
"2023-жылдын 18-январында Кыргызстан ИИМинин интерпол Улуттук борбордук бюросунун кайрадан жөнөтүлгөн кайрылуусунан кийин эл аралык издөөдө жүргөн 30 жаштагы Ибраев Болгариянын Интерполу аркылуу кайрадан кармалып, камакка алынды", — деп билдиришти ИИМден.
Азыркы учурда компетенттүү органдар аны өз өлкөсүнө экстрадициялоо боюнча иш-чараларды жүргүзүп жатат.