БИШКЕК, 19-янв. — Sputnik. Жогорку Кеңештин депутаты Айбек Осмонов Ош шаарында кылмыштуу топтордун жаңжалынын видеосун чыгарган сайттарды жабуу керектигин айтты.
Эл өкүлү окуянын видеосун эки миллиондон ашык адам көргөнүнө токтолуп, ИИМ ошол кадрда көрүнгөн адамдардын беттерин жаап же такыр эле чыгарбоого аракет кылса болмоктугун белгиледи.
"Мамлекеттик телеканалдар да, мамлекеттик эместер да көрсөттү. Маалымат катары берген жакшы, бирок келечек муунга терс таасир этерин эске алуу керек. Коомдо ушундай иш кылса болот экен деп кабылдашты. Мындай иштер болгондо ЖМКларга чыгарбоого чакырам. Силер да (милиция — ред.) колуңардан келишинче иштесеңер, кээ бир сайттарды убактылуу жапсаңар болот. Бул окуя өспүрүмдөргө абдан катуу сокку болду", — деди Осмонов.
Ички иштер министринин орун басары Нурбек Абдиев аталган видео коомдо эки ача ой жаратарын айтты.
"Бул эки уюшкан кылмыштуу топтун өз ара араздашуусу болгон. Биздин жаш балдар дагы эгер кылмыштуу топко кошулсаң жоопко тартыласың же өздөрү тараптан эле колу-бутун сындырып өлтүрүп кетет деп түшүнүшү керек. Ушул жагынан дагы жаштарга таасир берет деген ой", — деди Абдиев.
Ошондой эле ал ИИМ оор кылмыш болгон жердеги сүрөттөрдү чыгарбаганга мүмкүн болушунча аракет кыларын, бирок кээде видеобайкоодон алынган кадрлар жарыяланып кетерин кошумчалады.
Белгилей кетсек, 12-январь күнү Ош шаарында кылмыштуу топтун мүчөлөрү мыкаачылык менен сабалып, мунун кесепетинен алардын бири көз жумган. Экинчиси оор абалда ооруканага жеткирилген.
Кылмышты уюштурууга шектелип кримтөбөл "Женго" каймана аты бар Кадыр Досонов жана жаңжалдын катышуучулары делген төрт адам кармалган.