БИШКЕК, 13-янв. — Sputnik. Чүй облусунун Ички иштер башкы башкармалыгы чет элдик ишкерлерди карактоо үчүн кол салгандарды кармагандыгын билдирди.
Маалыматта 9-январь күнү таңкы саат 05:00дө Сокулук айылындагы ишканалардын биринин имаратына бет капчан, куралчан төрт адам киргендиги айтылат.
"Алар фирманын кызматкерин жана Кытайдан келген ишкерлерди сабап, байлап, ишканадан 650 миң сомду алып кетишкен", — деген милициядан.
Аталган факт боюнча Кылмыш жана жаза кодексинин 207-беренесинин ("Каракчылык") негизинде кылмыш иши козголгон.
Ыкчам-издөө иштеринин жүрүшүндө тоноочулукка шектелип беш адам, анын ичинде уюшкан кылмыштуу топтун мүчөсү кармалган. Алар убактылуу кармоочу жайга киргизилди.