БИШКЕК, 27-дек. — Sputnik. Россиянын президенти Владимир Путин чет мамлекеттердин орус мунайына жана мунай продукциясына максималдуу бааны киргизүүсүнө жооп катары атайын экономикалык чаралар жөнүндө жарлыкка кол койду. Документ укуктук маалымат порталында жарыяланды.
Жарлыкка кол коюуга АКШнын жана ага кошулган өлкөлөрдүн, ошондой эле эл аралык уюмдардын достукка жана эл аралык укукка каршы аракеттери себеп болгон. Россиянын кызыкчылыгын коргоо — дагы бир себеп.
"Баага чек коюу механизми колдонулган учурда Россиянын мунай жана мунай продукциясын чет өлкөлүк юридикалык жана жеке жактарга жеткирүүгө тыюу салынат. Аталган тыюу жеткирүүнүн бардык этаптарында, акыркы сатып алуучуга чейин колдонулат”, — деп айтылат жарлыкта.
Жарлык 1-февралдан тартып күчүнө кирет жана 2023-жылдын 1-июлуна чейин колдонулат. Мунай ташууга тыюу салуу мөөнөтүн өкмөт аныктайт. Бирок өзгөртүүлөр болушу мүмкүн.
"Жеткирүүгө жарлык менен тыюу салынган Россиянын нефтисин президенттин атайын уруксаты менен гана жеткирүүгө мүмкүн болот”, — деп айтылат документте.
5-декабрда Батыштын мунай санкциялары күчүнө кирди. Евробиримдик деңиз аркылуу ташылган орус мунайын кабыл алууну токтотту, ал эми G7 өлкөлөрү, Австралия жана Евробиримдик деңиз аркылуу ташуу үчүн баанын бир баррелине 60 долларлык чек киргизди. Россия бийлиги өз кезегинде мунайды баанын чектелишин колдой турган өлкөлөргө жеткирбей турганын белгилеген.