БИШКЕК, 27-дек. — Sputnik. Кытай бийлиги 8-январдан тарта өлкөгө келгендер үчүн карантинди жоюуну пландап жатат. Бул тууралуу РИА Новости South China Morning Post басылмасына шилтеме берип жазды.
Маалыматта 26-декабрда Кытайдын Саламаттык сактоо комитети расмий сайтына билдирүү жарыялагандыгы жазылган. Талапка ылайык, 2023-жылдын 8-январынан тартып Кытайга учуп келерге 48 саат калганда ПЦР-тесттен өтүү керек. Тести жакшы чыккандар Кытайга ден соолук кодун көрсөтпөстөн эле кире алышат. Өлкөгө киргендердин баарына ПЦР-тест жана борборлоштурулган изоляция жокко чыгарылат.
Учурда Кытайга чет өлкөдөн кирген адамдар беш күн борборлоштурулган карантинде жана үч күн үй изоляциясында болушу керек.
Кытайда эпидемияга каршы көзөмөл дүйнөдөгү эң катаал чаралардын бири бойдон калганына карабастан эпидемиологиялык абал кайрадан начарлоодо. Ноябрь айынын башынан бери COVID-19дун күч алгандыгынан улам өлкөнүн көптөгөн шаарларында бүтүндөй аймактар карантинге алынып, алардын жашоочулары үзгүлтүксүз ПЦР текшерүүсүнөн өтүп жатышкан. Буга байланыштуу ноябрь айынын аягында Шанхай, Пекин, Гуанчжоу, Ухань шаарларында өтө катуу чектөөлөргө каршы нааразылык акциялар өткөн. Демонстранттар чектөөлөрдү тез арада алып салууну жана масштабдуу ПЦР тестирлөөнү токтотууну, ошондой эле эпидемияга каршы чараларды жеңилдетүү талап кылышкан.
7-декабрда бийлик коомчулуктун нааразычылыгына байланыштуу эпидемиологиялык саясатынын жаңы эрежелерин киргизген. Ага ылайык, милдеттүү түрдө жасалчу ПЦР-тест жоюлуп, жеңил оорулар үчүн үйдө обочолонуу, дене табын түшүрүүчү дарыларды онлайн жана оффлайн сатып алууга чектөөлөр алынган. Мындан тышкары, улгайган адамдардын эмдөөдөн өтүү процесси ылдамдаган.
Кийинчерээк Кытай бийлиги 2020-жылдан бери шаардан-шаарга каттаган жүргүнчүлөрдүн кыймылын көзөмөлдөп келген тиркемени колдонууну токтоткон. Ошондой эле COVID-19 инфекциясынын симптомсуз учурлары жөнүндө маалыматтарды жарыялоону да токтоткон.
Өткөн аптада өлкөдө күнүнө 37 миллионго чейин адам ооруну жуктуруп алышы мүмкүн экени кабарланган. Маалымат каражаттары оорунун жеткен чеги январь айынын башына туура келиши мүмкүн экенин жазып жатышат.