БИШКЕК, 24-дек. — Sputnik. Республикалык ден соолукту чыңдоо жана массалык коммуникация борборунун адистери боорду жабыркаткан В гепатитине каршы эмдөө тууралуу айтып беришти.
Кыргызстанда гепатитке каршы эмдөө 2000-жылдан тарта жүргүзүлүп келет.
Вакцинация ымыркай жарыкка келген күнү эле, 24 саат ичинде төрөт үйүндө жүргүзүлөт. Андан кийин бөбөктөргө 2 ай, 3,5 ай жана 5 ай аралыгында сайылат.
Учурда өлкө боюнча жаш балдардын арасында гепатитке чалдыккан учурлар жокко эсе. Бирок бул оору чоңдордун арасында кенен жайылып бараткандыгы байкалат.
Бишкектик дарыгерлер андыктан үстүбүздөгү жылдын декабрь айынан баштап өлкө боюнча чоңдорду В гепатитине каршы эмдөө кампаниясы жүрүп жаткандыгын дагы бир ирет эске салышты.
Боордун оорусун алдын алууну каалаган 23 жаштан 65 жашка чейинки кыргызстандыктарга төмөнкү маалыматтар сунушталат:
бекер эмдөөдөн өтө алышат;
вакцина үч жолу бир жана алты ай аралык менен сайылат;
эмдөө кампаниясынын биринчи этабы Бишкек жана Ош шаарларында, Чүй облусунда жүргүзүлөт;
эмдөө 2023-жылдын январь айынан тарта республиканын бардык аймактарында болот;
эмдөө россиялык өндүрүштөгү "Регевак В" вакцинасы менен жүргүзүлөт;
вакцина универсалдуу. Аны жаңы төрөлгөн балдарга да, чоңдорго да колдонсо болот. Аны пландуу (вакцинация графигине ылайык) жана шашылыш (инфекцияланган биоматериал менен байланышта болгон учурда) В гепатитин алдын алуу максатында колдонсо болот;
учурда эмдөөлөрдү Бишкек жана Ош шаарларындагы үй-бүлөлүк дарыгерлер борборлорунан алса болот.