2023-жылдан тарта тоо-кен тармагындагы ишканаларга көзөмөл күчөтүлөт. Салык кызматы менен бирге биздин департамент ай сайын текшерип турат. Бул тууралуу Алмаз Туманов Sputnik Кыргызстан радиосуна маек куруп жатып билдирди.
Анын айтымында, азыркы учурда тоо-кен тармагында ишмердүүлүгүн жүргүзгөн компаниялар жылына бир ирет 5гр отчетун (N 5-гр формасында катуу пайдалуу кендердин запастарынын абалы жана өзгөрүүлөрү жөнүндө маалымат — ред.) гана тапшырып келишет.
"Тоо-кен тармагы быйыл өлкө бюджетине 39 миллиардан ашуун сом алып келип, рекорддук көрсөткүчкө жетти. Былтыр бул сумма 22 миллиард болсо, мурдагы жылы 18 миллиардды түзгөн болчу. Мындай ири көлөмгө "Кумтөр" компаниясынын бизге өткөндүгүнө байланыштуу жетишип отурабыз. Буюрса тоо-кен тармагында 2023-жылдан тарта революциялык иштерди баштоого белсенип турабыз. Алардын бири — мамлекеттик кызмат көрсөтүүлөрдү акы төлөө системасы менен жүргүзүү. Ошол эле долбоорлор, отчеттор, мамлекеттик запас комиссиясына, лицензиялык комиссияга кирип жаткан документтерди тейлөөгө бирдиктүү сумма бекитип, акы төлөөгө өткөргөнү жатабыз. Түшкөн каражатты мамлекеттик кызматтарга жаш кадрларды тартууга, техникалык базабызды чыңдоого жумшайбыз. Учурда бул долбоорду министрлер кабинетинин жетекчиси да, өлкө башчысы да жактырды", — деди Туманов.
Ал мамлекеттик кызматты акы төлөө системасына өткөрүү коррупциялык кадамдарга тоскоол болуп, мамлекеттик кадрларды ар кандай азгырыктардан сактай турганын кошумчалады.