БИШКЕК, 20-дек. — Sputnik. Саламаттык сактоо министрлигинин алдындагы Ден соолукту чыңдоо борбору булганган абанын балдардын саламаттыгына жана өсүп-чоңоюшуна тийгизген таасирин тизмектеди.
Борбордун адистери балдардын бардык органдары өсүп-өрчүү стадиясында болгондуктан кирдеген аба процесске терс таасир тийгизерин эске салышты. Мындан тышкары, балдар чоңдорго караганда көбүрөөк кыймылдашат, кыймыл канчалык көп болсо өпкөгө аба ошончолук көп кирет.
"Абанын ашыкча булганышы баланын акыл-эсинин өсүшүнө дагы зыянын тийгизет. Ал эми кош бойлуулук учурунда дайыма кир абадан дем алган аял баланы ара төрөшү мүмкүн же ымыркайдын салмагы аз болот", — дешти адистер.
Борбордон балдар бар жердеги абаны таза кармоонун бир нече жолун айтышты:
балдар жайгашкан, жашаган имараттын ичинде чылым чекпеңиз;
үйдү жылытканга, тамак даярдаганга электр энергиясынын экологиялык таза түрүн тандоого аракет жасаңыз;
тамакты короодо жасоо бөлмөдөгү абанын таза сакталышын шарттайт, бирок мындай мүмкүнчүлүк жок болсо ашкананы дайыма желдетип туруңуз;
уулуу химиялык заттар бөлүнүп чыккан шамдарды жакпаңыз, жагымсыз жыттарга каршы ароматизаторлорду (освежитель) колдонбоо зарыл;
эшикте, сыртта балдарды кир абадан коргоо үчүн автоунаа аз жерлерде сейилдөө зарыл.
"Көпчүлүк ата-энелер балдары менен сейилдөөгө шаардын борборлоруна барышы мүмкүн. Мында унаа көп болгондуктан андан бөлүнүп чыккан газ абаны булгайт. Балдардын мындай абада сейилдөөсү ага зыян. Мындан тышкары, абдан көп газ бөлүнүп чыккан автоунааны көргөндө баланы көтөрүп алган туура. Анткени анын бою кичинекей болгондуктан дем алуу органына булганган аба түз келиши мүмкүн", — дешти адистер.
Алар бала дем алган абанын сапатынан тышкары анын тамактануусу жана активдүүлүгү өсүп-чоңоюшуна пайдалуу экенин кошумчалашты.