БИШКЕК, 14-дек. — Sputnik. Бишкекти каптаган ыш көйгөйүн талкуулоо учурунда вице-спикер Нурбек Сыдыгалиев менен депутат Сүйүн Өмүрзаков кайым айтышты.
Жыйындын башында бир катар депутаттар ыш маселеси боюнча бүгүн өкмөт мүчөлөрүн чакырып маалыматын угууну сунуштаган. Вице-спикер ал регламентке туура келбей турганын айтып, кийинки жумада кароого үндөдү.
Андан соң Өмүрзаков чыгып, маселени бүгүнкү күн тартибине киргизүүнү талап кылды.
"Эмдиги жумага калтырабыз дегенди кандай түшүнсөк болот? Адам өлүп жатат, анан кантип кийинки аптага калтырып жатасыңар. Абанын булганышын тез арада токтотуш керек. Анализдерди бердик, жылдан жылга адамдардын өлүмү көбөйүп жатат. Мына Ош шаарында дагы көбөйдү. Эмне иш кылып жатканын айтып жооп беришсин. Бардык маселени токтотуп ошону угалы. Ден соолук болбосо кантип иштейбиз. Жаш балдар ооруп оорукананы каптап кетти", — деди Өмүрзаков.
Сыдыгалиев муну кадимкидей эле түшүнсө болорун белгиледи.
"Регламент жол бербей жатса мен кантип күн тартибине киргизейин? Анда эртеңкиге чакыралы", — деп сунуштады вице-спикер.
Депутат бул жерде оорчулук жаратуунун кереги жоктугун, көйгөйдү өздөрү жаратып жатканын айтты.
"Эл кыйналгандан арзан, сапатсыз көмүр жагып жатат. Ошондой көмүрдөн ышталып жатабыз, көчөгө чыксаңыз көрөсүз, отканада жүргөндөй болуп жатабыз. Эртең кеч болуп калат", — деди Өмүрзаков.
Сыдыгалиев "Мен деле көчөгө чыгып жатам. Сиз түшүнөсүзбү, регламент жол бербейт, мен эмне кылайын" деп жооп берди.
Өмүрзаков ордунан туруп кайра дагы сүйлөп жатканда кесиптеши Медер Алиев ортого түштү.
Депутаттар талашып-тартышып отуруп аягында өкмөт мүчөлөрүн бүгүн саат 14:00гө чакыра турган болду.