БИШКЕК, 14-дек. — Sputnik. Боом капчыгайында жол боюнда каттама бышырган апа үй-бүлөсү менен Абу-Дабиге кетти. Ал шейхтин ашпоздоруна каттама даярдаганды үйрөтөт. Бул жөнүндөгү видеону блогер Адилет Ногойбаев жарыялады.
"Абу-дабилик шейхтер Лира эжени, анын сиңдилерин эки аптага чакырышкан. Алар Абу-Дабиде эс алганча ашпоздоруна каттама даярдаганды үйрөтөт. Элестетиңиздер, аларга биздин каттама канчалык жаккан", — дейт блогер.
Жарыяланган видеодо Лира апанын каттамасы кандайча шейхтерге жагып калгандыгы айтылат.
"Шейхтер менен делегациябыз жолдон токтоп, каттама жедик. Алар анда каттаманы биринчи жолу жеп көрүштү. Ысык-Көлдөн келе жатып кайра ошол жерге токтодук. Бириккен Араб Эмирлигинин көрүнүктүү ишкерлеринин бири — Мухаммед мырза өзүнүн шейх-досторун коноктоо үчүн Лира эжени, сиңдилерин отелге чакырды, баарын каржылады. Алар Абу-Дабиде эки апта эс алышат, соңунда Лира эже ашпоздорду каттама даярдаганды үйрөткөнү үчүн да сыйланат. Кыргызстандык апанын жөнөкөй окуясы", — деп айтылат видеодо.
Боомдогу Чолок айылы чынында каттамасы, самоордун сүт катыкталган чайы менен атагы чыкты. Sputnik Кыргызстан айылдын келиндери ишти кантип баштап, кандайча улап кетишкени тууралуу материал даярдаган.