БИШКЕК, 11-дек. — Sputnik. Көп жылдар бою Европа Украинадагы жаңжалды көз жаздымда калтырып, анын биринчи белгилерин көргүсү келген эмес. Ошол эле европалык саясатчылар азыр да тынчтыкты орнотуу үчүн ортомчу болгусу келген жок. Мындай пикирин Венада сүйлөп жатып Австриянын экс-вице-канцлери Хайнц-Кристиан Штрахе билдиргенин РИА Новости жазды.
"Көп жылдар бою Европа четте карап турду, азыр дагы ортомчу болгон жок. Качан европалык саясатчылар биз тынчтыкты каалайбыз деп кадам жасашат? Эки тарапты сүйлөшүүгө качан отургузушат? Тескерисинче, курал-жарак жеткирилгенин, санкцияларды көрүп жатабыз", — деди Штрахе.
Ал Украинадагы азыркы жаңжалдын тамыры илгертен бери келе жатканын эске салды. Саясатчынын айтымында, 2014-жылы Украинада революция, төңкөрүш болуп, аны уюштурууга АКШнын ЦРУсу активдүү катышкан.
"Анда бийликти күч менен басып алуу болду. Натыйжада жарандык согуш чыгып, анын натыйжасында Украинанын чыгышында, Донецк, Луганск шаарларында 10 миңден ашуун адам мыкаачылык менен набыт болгон. Австриялыктар бейтарап өлкө катары биздин саясатчылардын кайрадан бейтараптуулукту колдонушун каалайбыз. Австриядагы кээ бир партиялар өлкөнү НАТОго мүчө кылууну көп жылдардан бери биринчи жолу кыялданып жатканын көрүп жатабыз. Буга көңүл бурбай коюуга болбойт", — деди саясатчы.
Ишембиде Венада катуу суукка карабастан митинг болду. Нааразылыктын катышуучулары Австрия бийлигинен ЕБдин Россияга каршы санкциялык саясатын колдоо чечимин кайра карап чыгууну, республиканын бейтараптуулугун толугу менен сактоону, мыйзамсыз миграцияга каршы аракеттерди көрүүнү талап кылышты.