БИШКЕК, 8-дек. — Sputnik. Социалдык фондго камсыздандыруу төлөмдөрүн төкпөгөн жаран пенсияга чыга албайт. Бул туурасында Соцфонддун төрагасы Бактияр Алиев парламентте билдирди.
Депутат Улан Бакасов эч жерде иштебеген адам пенсияга чыга алабы же жокпу, болсо канча сом аларын сурады. Ал Нарында өмүр бою мал багып, дыйканчылык менен алектенгендерди мисал келтирди.
"Социалдык фондго төлөм жүргүзгөндөр гана пенсияга чыга алат. Болбосо Социалдык камсыздоо министрлигинен 2000 сомдон пособие алат. Мамлекет аны пенсиянын ордуна жөлөк пул катары төлөп берет", — деди Алиев.
Ошондой эле ал өлкөдө жылына 50 миңден адам пенсияга чыгып жатканын кошумчалады.