БИШКЕК, 30-ноя. — Sputnik. Кыргыз өкмөтү сырттан электр энергиясын сатып алуу үчүн Азия өнүктүрүү банкынан 50 миллион доллар алып жатат.
Аталган келишимдин долбоору парламентте биринчи окууда каралды. Финансы министринин орун басары Руслан Татиков каражаттын 25 миллиону грант, калганы кредит экенин айтты. Насыя 24 жылга 1,5 пайыздык коюм менен алынат, анын сегиз жылы жеңилдетилген мезгил (бул учурда 1 пайыздык коюм).
Энергетика министринин орун басары Сабырбек Султанбеков каражаттын баары электр кубатынын импортун төлөөгө жумшаларын айтты.
Эл өкүлү Алишер Козуев карызды кайра карыз менен жаппай, каражатты ички каржы булактардан кароону сунуштады.
"Биринин шапкасын экинчисине кийгизүү болуп жатат экен да. Бул каражатты ГЭС курганга же башка тетигин алганга жумшасак бир жөн. Булар алып эле баарын карыз төлөгөнгө берип жатпайбы. Кийин ал каражатты кимдин эсебинен, кантип төлөйсүздөр? Өзү сырттан алынган карыздын жарымы энергетикага, жарымы жол тармагына жумшалат. Эртең муну төлөө жагы дагы бар. Эмне муктаждык болду, өзүбүздө каржы булактары жокпу, издеп көрсөңөр болбойт беле?", — деди Козуев.
Султанбеков бул карыз кайра эле электр энергиясынан түшкөн акча менен төлөнөрүн айтты.
"Жаңы кубаттуулуктар ишке кирсе анын орду жабылып калат. Азыр эми кыйынчылык болуп жатпайбы", — деди министрдин орун басары.
Ал эми Татиков учурда Кыргызстанда чыгымдар өтө көп болуп, ички каражаттар Баткен облусун калыбына келтирүүгө, мектеп, бала бакчаларды курууга кетип жатканын билдирди. Ошон үчүн сырттан акча зарылчылыгы жаралганын белгиледи.