БИШКЕК, 16-ноя. — Sputnik. Россиянын Тышкы иштер министрлиги Польшага түшкөн ракета боюнча расмий билдирүү жасап, НАТОго мүчө-мамлекеттердин ичинен айрымдарынын ага болгон реакциясын "кыжырды келтире тургандай" деп сыпаттады. ТИМдин билдирүүсү сайтына жарыяланган.
"НАТОго мүчө-өлкөлөрдүн кээ бири жана алардын ЖМКлары абалды териштирбей туруп ракета окуясына Россия күнөөлүү болушу мүмкүн деген жалган маалыматтарды чыгарууга ашыкты", — жазылган ТИМдин маалыматында.
Дипөкүлчүлүк Киев режими да бул окуяда өтө тездик менен Россияга көө жабууга аракет кылганын белгилеген.
"Киев бийлиги Россияны күнөөлөш үчүн бардык мүмкүнчүлүктү пайдаланып келет. Анын үстүнө Зеленскийдин режими колдоочуларын алсыратып жаткандыктан, алар Батыштын колдоосун бекемдөөгө аракет кылууда", — деп жазылат билдирүүдө.
Эске салсак, 15-ноябрь күнү кечинде Польша ЖМКлары Украина менен чектешкен аймагына, тагыраагы, Пшеводув районуна эки ракета кулаганын билдирип, эки адам каза болгонун маалымдаган.
Associated Press басылмасы жазгандай, булар россиялык ракетаны атып түшүрүү үчүн учурулган Украина армиясынын ракеталары болгон.
Польшанын Тышкы иштер министрлиги окуя болору менен ракеталар Россияда чыгарылганын маалымдаса, президенти Анджей Дуда бул ракеталар кимге таандык экендиги тууралуу так маалымат жок экенин айткан. НАТОнун башкы катчысы Йенс Столтенберг Анджей Дуда менен сүйлөшүп, бардык фактыларды аныктоо керектигин билдирген.
Өз кезегинде Россиянын Коргоо министрлиги Украина — Польша чек арасына жакын жерге ракета менен сокку урулбаганын билдирип, интернетте тарап жаткан ракета калдыктарынын сүрөттөрү Россияга тиешеси жок экенин белгилеген.
Ал эми АКШ президенти Жозеф Байден алдын ала алынган маалыматтар ракеталар Россиядан учурулган деген версияны четке кагарын айтып, шашылыш жыйынтык чыгарбай турууга чакырган.