БИШКЕК, 12-ноя. — Sputnik. Улуттук жазуучулар союзунда Мукай Элебаев атындагы республикалык адабий сыйлык уюштурулду. Бул тууралуу бирикме сайты аркылуу кабарлады.
Маалым болгондой, сыйлык прозаиктерди колдоо максатында уюштурулуп жатат.
"Адабий сыйлык тарбиялык таасири бар мыкты прозалык чыгарма жазгандарга берилет. Ага чыгармачыл союздар, маданият бирикмелери, коомдук уюмдар талапкерлерди көрсөтө алат. Адабий сыйлыкка көрсөтүүгө акыркы эки жылдын ичинде китеп болуп жарык көргөн прозалык чыгармалар сунушталат. Сыйлык алган жазуучуга Мукай Элебаев атындагы адабий сыйлыктын лауреаты наамы жана күбөлүк, Мукай Элебаевдин элеси түшүрүлгөн төш белги тапшырылат. Ал эки жылда бир жолу ыйгарылат", — деп жазылат жободо.
Аталган сыйлыкка чыгармаларды көрсөтүү, кабыл алуунун мөөнөтү, шарттары Жазуучулар союзу тарабынан белгиленген соң ЖМК, соцтармактарга жарыялана турганы кошумчаланды.
Сыйлыктын шарт-талабы тууралуу союздун сайтынан кененирээк окуп-билсеңиздер болот.