БИШКЕК, 9-ноя. — Sputnik. Бир катар чет өлкөлүк компаниялар Кыргызстанда электрондук кызмат көрсөтүүлөргө кошумча нарк салыгын төлөө талабын четке кагышты. Бул тууралуу Мамлекеттик салык кызматы кабарлады.
Маалым болгондой, мекеме ушул жылдын ичинде бир катар ири уюмдардын, анын ичинде Alibaba, Meta*, Netflix, Google, Amazon компанияларынын электрондук почталарына салыктык каттоодон өтүү жана Кыргызстанда кызмат көрсөтүүлөрдү электрондук түрдө ишке ашыргандыгы үчүн кошумча нарк салыгын төлөө сунушу менен расмий каттарды жөнөткөн.
"Тилекке каршы, аталган компаниялар бир нече ай бою мекеменин Google салыгын төлөө талабын четке кагып келишкен", — деп айтылат маалыматта.
Бүгүнкү күндө Кыргызстанда электрондук кызматтарды көрсөткөн 18 чет өлкөлүк компания www.vat.salyk.kg сервисинен кошумча нарк салыгын төлөөчү катары аралыктан каттоодон өткөн. Анын ичинде Бириккен Араб Эмирлигинде төрт, Нидерланддарда үч, АКШда, Улуу Британия жана Россияда экиден, Ирландия, Армения, Казакстан, Кипр жана Латвияда бирден компания бар.
Google салыгы Кыргызстанда катталган, домендик аталышын же IP-дарегин пайдаланбастан электрондук кызмат көрсөткөн чет өлкөлүк уюмдарга тиешелүү.
* — Россияда экстремисттик уюм деп таанылып, ишмердүүлүгүнө тыюу салынган