БИШКЕК, 8-ноя. — Sputnik. Кыргызстандын тышкы иштер министринин орун басары Азизбек Мадмаров Сауд Арабиянын ТИМ башчысынын орун басары Валид Аль-Хурейджи менен жолукканын ТИМдин маалымат кызматы кабарлады.
Тараптардын сүйлөшүүсү 7-ноябрда Эр-Риядда өткөн. ТИМ өкүлдөрү эки тараптуу мамиленин жакшы нукта бара жатканын белгилешип, аны саясий, соода-экономикалык жана маданий-гуманитардык жаатта мындан ары да өнүктүрүү маселелерин талкуулашкан.
"ТИМ башчыларынын быйылкы расмий сапарларын эске алуу менен тараптар жакын арада Кыргызстандын президенти Садыр Жапаровдун Сауд Арабияга расмий сапарын уюштурууга бардык күч-аракетти жумшоону макулдашты", — деп жазылат маалыматта.
Ошондой эле алар Сауд өнүктүрүү фонду аркылуу Кыргызстанда ишке ашырылып жаткан инфраструктуралык жана социалдык-экономикалык долбоорлордун маанилүүлүгүн белгилешип, жаңы долбоорлорду алдыга жылдырууну талкуулашкан.