БИШКЕК, 8-ноя. — Sputnik. Эр-Рияд шаарында Кыргызстан менен Сауд Арабиянын тышкы иштер министрлеринин орун басарларынын ТИМ аралык саясий кеңешмеси болуп, анда бир катар маселелер талкууланды. Бул тууралуу дипөкүлчүлүктүн маалымат кызматы кабарлады.
Белгилей кетсек, кыргыз делегациясын министрдин орун басары Азизбек Мадмаров жетектеп барган. Ал Сауд Арабиядагы кесиптеши Сауд Аль-Сати менен соода-экономикалык байланыштарды чыңдоо жана Кыргызстанда туризм, гидроэнергетика, энергиянын кайра жаралуучу булактары, айыл чарба жана жер казынасын пайдалануу жаатындагы инвестициялык долбоорлорду илгерилетүү маселелерин талкуулаган.
Сауд Ас-Сати Сауд өнүктүрүү фонду жана падыша Салмандын гуманитардык жардам борбору аркылуу Кыргызстанда социалдык долбоорлорду жана кайрымдуулук акцияларын ишке ашыруу боюнча кызматташууну улантууга даяр экенин билдирди.
"Тараптар Бишкекте кыргыз-сауд бизнес форумун, биргелешкен Ишкерлер кеңешинин жыйындарын өткөрүү, эки өлкөнүн ортосунда туруктуу аба каттамдарын эртерээк ачуу жана кыргыз жарандары үчүн Сауд Арабияга кирүүгө визалык талаптарды жеңилдетүүнү макулдашты. Мадмаров Кыргыз-Сауд биргелешкен өкмөттөр аралык комиссиянын алдыдагы жыйыны эки тараптуу мамилелерге кошумча түрткү болорун белгиледи", — деп жазылат билдирмеде.
Мындан тышкары, министрдин орун басарлары жогорку деңгээлде боло турган иш-чаралардын алкагында кол коюуга даярдык көрүү, эл аралык уюмдардын (БУУ, ИКУ, ШКУ) алкагында кызматташууну улантууну сүйлөшкөн.