БИШКЕК, 6-ноя. — Sputnik. "Кумтөр голд компани" компаниясынын мурдагы жетекчиси Теңиз Бөлтүрүктүн аялы Ильмира Алпысбаева президент Садыр Жапаровго кайрылды. Катты социалдык тармактарга жайгаштырып, өзүнүн жана балдарынын атынан жазылганын кошумчалаган.
Алпысбаева кичинекей балдары бар экенин белгилеп, өлкө башчысынан Теңиз Бөлтүрүккө ырайым кылууну, ага козголгон кылмыш ишине көңүл бурууну өтүндү.
"Күйөөмдүн үй камагына чыгышына уруксат берүүнү суранам. Ден соолугу начар. Мындай абалда түрмөдө отура албайт, мен аны жоготуп алуудан корком. Ордуна өмүрүмдү берүүгө да даярмын, бирок анын өмүрүн сактап калууга жардам бериңиз. Жолдошум тергөө менен кызматташат. Качып кетүү тууралуу ою да болгон эмес. Кан басымы көтөрүлүп, жүрөгү ооруйт. Мен анын кен жайгашкан жерлерге чыгып жүргөнүнө таң калып жатам?... Күйөөмдүн жүрөгү жаздан баштап ооруп жүргөнүн жакында эле билдим. Ал муну менден жана балдарынан санаа тартышпасын деп жашырыптыр. Азыр ага иштегенге да болбойт, биз анын өмүрүн сактап калууну гана каалайбыз", — деп жазылат кайрылууда.
Каттын соңунда Алпысбаева Азат 15 жашта, Элдана 13 жашта, Атилла 9 жашта деп балдарынын атын кошкон.
Айрым маалыматтар боюнча, Теңиз Бөлтүрүк алты баланын атасы.
Ал 15-сентябрда Бишкек шаардык сотунун чечими менен эки айга камакка алынган. Башкы прокуратура "Кумтөр голд компани" ишканасын текшергенден кийин үч кылмыш ишин козгоп, коррупциялык схемадан улам мамлекетке 1 миллиард сом өлчөмүндө зыян келтирилгенин аныктаган.
Андан мурун Эсеп палатасы "Кумтөр голд компани" ишканасынан финансылык алешемдиктерди аныктап, компания жетекчиси Теңиз Бөлүтүрүк менен финансы директору Рыспек Токтогулов кызматтан четтетилген.