Окуучуну коомдук транспорттун айдоочусу салбай кетсе, бул боюнча арызданса болот. Тилекке каршы, жаш балдар муну биле беришпейт. Бул тууралуу Байказы Айтикул уулу Sputnik Кыргызстан радиосуна маек куруп жатып билдирди.
Анын айтымында, Бишкек шаары боюнча 104 мектептин ар бирине Кайгуул кызматынан бирден кызматкер бекитилген.
"Борбор калаада 104 орто мектепке Кайгуул кызматынан бирден, айрымдарына 2-3төн кызматкер бекитилген. Алар иш күндөрү таңкы 7:00дөн 8:00гө чейин, кечкисин 17:00дөн 19:00гө чейин мектеп окуучулары келип жана кетип жаткан учурда иштешет. Ошол билим берүү мекемесинин айланасындагы коомдук жана транспорт коопсуздугун көзөмөлдөшөт. Балдарды коомдук транспортко салбай кеткен учурлар катталса, балдар аны мугалим же ата-энелерине айтышсын. Ал эми мугалимдер мектептерде ачык сааттарда балдарга коомдук транспорт албай кеткен учурда фото, видеофиксация кылып калса болорун үйрөтүшсө жакшы болмок. Ошондой эле ата-энелер да балдарына бул маселени чечүүгө жардамдашып, тартылып алынган материалдарды биздин 0(509)102-122 күнү-түнү иштеген Whatsapp номерибизге жөнөтүшсө болот. Болбосо мугалимдер түз эле мектептен биздин кызматкерлерге кайрылышсын", — деди Айтикул уулу.
Ал келип түшкөн даттануулар боюнча Кайгуул кызматы Бишкек шаардык мэриясы менен биргеликте жоопкерчиликке тартуу иштерин жүргүзөрүн кошумчалады.