БИШКЕК, 22-окт. — Sputnik. Бүгүн Баткендеги Кадамжай районунун Сарыбай айылында кылмышка шектүү эки кишини кармоо учурундагы атышууда милициянын үч кызматкерине ок тийди. Бул тууралуу Баткен облустук милициясынын маалымат кызматынан кабарлады.
Жаракат алган тартип сакчылары Кызыл-Кыя шаардык ооруканасына жиберилген. Милициядан орган кызматкерлерине ок чыгаргандар, 18-октябрда болгон кандуу окуяны жасады деп шектелген адамдар экендигин айтышты. Эске салсак, 19-октябрда Баткен облусунун Кадамжай районунун Марказ айылында киши колдуу болгон ата-баланын сөөгү табылган. Ал эми кылмыш жасагандар из жашырган.
"Ыкчам иликтөө иш-чараларынын жүрүшүндө жогорудагы кылмышты 28 жаштагы А уулу Ф. менен 19 жаштагы Б.А. жасагандыгы аныкталып, издерин жашырып качып жүрүшкөн", — деп билдирди милициядан.
Шектүүлөрдү издөө учурунда, жергиликтүү усталардан Сарыбай айылындагы мечиттин чатырында эки кишинин жашынып жатканы боюнча кабар түшкөн. Маалыматты тактоо үчүн милиция кызматкерлери ыкчамдык менен барган учурда, аларды көздөй ок чыгарган эки адам тоо тарапка качкан.
"Шектүүлөрдү кармоо үчүн Кадамжай РИИБдин өздүк курамы ИИМдин Кылмыш иликтөө башкы башкармалыгынын ыкчам кызматкерлери жана ИИМдин Ош облусунун спецназы артынан түшкөн. Өз ыктыяры менен багынып берүү туурасында үн күчөткүч менен эскертилгенине карабастан, алар милиция кызматкерлерин аткылаган. Анын кесепетинен үч кызматкерге ок жаңылган. Жарадар болгон милиционерлер Кызыл-Кыя шаардык ооруканасына жиберилген", — деп билдирди маалымат кызматынан.
Кылмышка шектүү А.Б. мыйзамдуу талаптарга баш ийип, багынып берген. Ал эми экинчиси – А. у. Ф. кайрадан милиция кызматкерлерин аткылап, каршылык көрсөтө баштаган. Тартип сакчыларынын анын бутка атканына карабай, куралдуу каршылык көрсөтө берип, акыры башына ок жеп, каза болгон.
Окуя болгон жерге кароо жүргүзгөндө сайлуу жана сайсыз кош атар мылтык, уктоочу кап, эки рюкзак, ок-дарылары жана ок жасоого керектүү шаймандар табылып, далил катары алынган. Тирүү калган шектүү Б.А. райондук ИИБге алып келинип, сурак учурунда ата-баланы өлтүргөн кылмышты А. уулу Ф. менен бирге жасашканын билдирген.
Милициядан тергөө иштери жүрүп жатканын кошумчалашты.