БИШКЕК, 20-окт. — Sputnik. Жогорку Кеңеште чек аралаш айылдардын тургундарына курал берүү тууралуу мыйзам долбоору дароо үч окууда кабыл алынды.
Аталган демилге бүгүн жабык эшик артында каралып, добуш берүүдө колдоо тапты.
Ага ылайык, "Мобилизациялык даярдык жана мобилизация жөнүндө", "КР жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө", "Курал жөнүндө" жана "Чек ара ыйгарым укуктуу өкүлдөрү жөнүндө" мыйзамдарына өзгөртүү киргизилет.
Анын алкагында курал берүүдөн сырткары, керектүү учурда президентке аскердик абал киргизбей туруп эле жарым-жартылай мобилизация жарыялоого уруксат берилет.
Буга чейин тармактык комитеттерде каралганда демилгечи депутат Марлен Маматалиев бардык жарандарга эле курал берилбей турганын айткан.
"Негизинен биз эч бир согуштук аракеттерге даярданган жокпуз. Бирок "тынч жашагың келсе, согушка даярдан" дейт эмеспи. Биз мыйзамдарды даярдап коё берели. Баткенге барганда бул орчундуу маселе экенине күбө болдук. Коргоо министрлиги жана жергиликтүү калк тарабынан маселе көтөрүлдү. Азыр беш жылдык тажрыйбасынан кийин гана ок атуучу курал ала алышат. Биз керектүү учурда тажрыйбасына карабай эле курал берүүнү сунуштадык. Алар мергенчилер, атайын даярдыктан өткөн жарандар болушу мүмкүн", — деп түшүндүргөн Маматалиев.
Жалпысынан алганда, курал берүү процедурасы жөнөкөйлөштүрүлөт. Анын жол-жобосун Ички иштер министрлиги иштеп чыгышы шарт.
Бул Баткен облусундагы жана Алай, Чоң-Алай райондорундагы чек ара тилкелерине жакын жайгашкан аймактагыларга тиешелүү экени айтылды.
Бул мыйзамга Жанар Акаев демилгелеген жай тургундардан чек ара сакчыларын түзүп, курал берүү долбоору да бириктирилген. Анда учурдагы "Чек ара ыйгарым укуктууларын" "Чек ара сакчылары" деп атоо сунушталган. Алар чек араны ыкчам коргоо жана чек арачыларга кызматтык-күжүрмөн тапшырмаларды аткарууда көмөктөшүү үчүн тартылары айтылган.