БИШКЕК, 18-окт. — Sputnik. Азербайжандын бизнес тармагынын өкүлдөрү Чүй облусуна келип, ири ишканалар менен кызматташууга кызыкдарлыгын билдиришти. Бул туурасында министрлер кабинетинин маалымат кызматы кабарлады.
Аталган өлкөдөн келген ишкерлер тобунун жетекчиси Зафар Мамедов Чүй облусунун башчысы Нурил Алымбаев менен жолугушкан.
"Анда эки тараптуу сүйлөшүү жүргүзүлүп, ишкерликти өнүктүрүү жаатында конкреттүү иш-пландар талкууланды. Натыйжада ишкерлер Чүйдүн "Кант Сүт", "Үмүт и К" сыяктуу көрүнүктүү ишканалары менен кызматташуу тууралуу меморандумга кол коюшту. "Аталык Групп" ЖАК менен дагы кызматташуу боюнча макулдашуулар жүрүп жатат", — деп айтылат маалыматта.
Мындан сырткары, азербайжандык бизнесмендер Ысык-Ата, Кемин райондоруна убактылуу жайгашкан Баткендин тургундарына 252 миң сомдук гуманитардык жардам көрсөткөн.