БИШКЕК, 14-окт. — Sputnik. Кыргызстандын президенти Садыр Жапаров "Борбор Азия — Россия" саммитинде региондогу өлкөлөргө азык-түлүк коопсуздугу боюнча бирдиктүү стратегияны иштеп чыгып ишке ашырууну сунуштады.
"Бул аракеттер айыл чарба жана кайра иштетүү тармагын комплекстүү өнүктүрүүнү шарттайт деп эсептейм. Бүгүнкү күндө ар бир мамлекет азык-түлүк коопсуздугу боюнча өз механизмдерин киргизүүгө арекеттенүүдө, бул чоң коркунучтарды өз алдынча чечкенге алып келет. Аймактагы өлкөлөрдүн мүмкүнчүлүктөрү менен потенциалы эске алынбай жатат. Биздин көз карашыбызда, келечекте азык-түлүк тартыштыгын алдын алып жана аны өз ара толуктоону камсыздоо үчүн ички рынокту коргоо маселелери боюнча бирдиктүү чараларды көрүү зарыл", — деди Жапаров.
Президент азык-түлүктүн жана электр энергиясынын кымбатташы биринчи кезекте калктын аялуу катмарын кыйнап жатканына токтолуп, мындай абалда кирешеси аз үй-бүлөлөр тапканынын көп бөлүгүн азык-түлүккө жумшоого аргасыз болуп жаткандыгын белгиледи.
"Бул бизди абдан тынчсыздандырган маселе, анткени социалдык жана саясий туруктуулук азык-түлүктүн жеткиликтүүлүгү менен тыгыз байланышта. Мындай учурда аны экспорттоо жана импорттоо боюнча чектөөлөрдүн болбогондугу өтө маанилүү", — деди президент.