Тамара Асанбекова Бишкек шаарынын жашоочусу. Ал эки ирет операция болгон, бири жүрөгүнө, экинчиси кулагына жасалган.
"Жашың өткөн сайын түрдүү оорулар чыга берет. Менин жүрөгүмдө кемтик бар экен, жаш чакта билинбейт экен да. Кийин ооруп, өлүп калам го деген эле ойлор болуп калган. Дарыгерлердин кеңеши менен 56 жашымда жүрөгүмө операция жасашты. Андан башка деле бул куракта тизе, муундар ооруйт экен, бронхит кыйнайт. Ушунун баарын кыймыл менен жеңейин деп он жылдан бери дене тарбиялык көнүгүүлөрдү калтырбай күндө жасайм", — деди Асанбекова.
Мындан тышкары, ал бош отурган адамды ой басып, түрдүү ооруларга жетелеши мүмкүн деген пикирин билдирди.
"Өзүм курактуу, менден улуу, кичүү адамдарга айтат элем — пенсияга чыккандан кийин деле бош отурбагыла. Кайсы ишке жөндөмүңөр бар экенин таап, ошо менен алектенгиле. Түрдүү иш-чараларга катышкыла, ойду тазарткыла деп айткым келет", — деген Тамара апа пенсияга чыккандан кийин дүкөнгө сатуучулук жумушка орношкон. Муну менен катар эле ал кол өнөрчүлүк менен да алектенип, түрдүү улуттук буюмдарды тигип сатат.
"Дүкөнгө жип, шибеге, ийнелеримди көтөрүп келем. Кардар жокто балдар үчүн жүн байпак, оромол, дагы башка кийимдерди токуп отурам, сайма саям. Абдан жагат. Улгайган адамдар үчүн жарманкелер болгондо товарларымды сатам, өзүм иштеген дүкөнгө да коюп койгом. Өлкөдө өткөн улуттук маданий иш-чараларга да калтырбай катышам, элечек, белдемчи, улуттук кийимдерди тигем, ошолорду кийип алып барып келем. Бул багыттагы бир нече сынактын жеңүүчүсүмүн. Ооруну кыймыл сестентерине ишенем", — дейт Тамара Асанбекова.
Асанбекова 60 жаштан кийин тигүүчүлүк жөндөмүн өркүндөтүү үчүн алты курстан окуган.
Тема боюнча: