БИШКЕК, 14-окт.— Sputnik. Беларуста антитеррордук операция режими киргизилди. Күч түзүмдөрү айрым мамлекеттердин чагымчыл иштерине каршылык көрсөтүүгө даяр. Бул тууралуу Беларустун ТИМ башчысы Владимир Макей "Известия" басылмасына маек берип жатып билдирген.
Буга чейин Лукашенко Польша, Литва, Украинада диверсия, теракт жасоо жана Беларуста аскерий козголоң уюштуруу үчүн беларус радикалдарынын ичинен согушкерлерди даярдоо башталганын айткан. Дүйшөмбү күнү ал антитеррордук иш-чараларды жүргүзүп, аскердик-саясий кырдаалды көзөмөлдөө боюнча чаралардын комплексин иштеп чыгууну тапшырган.
"Известия" басылмасынын журналисти Россия президенти Владимир Путин Украинанын РФтин аймагында теракт даярдап жатканын айтканын эске салып, кийинчерээк Беларуска сокку урууга да даярдык көрүлүп жаткандыгы боюнча маалымат чыкканын белгилеген. Кабарчы Минск буга кандай жооп кайтарарына кызыккан.
"Украина "Беларустун чек арасында эч нерсе даярдаган жокпуз" деп суудан кургак чыгып жатат. Азыркы заманда бирөөгө ишенүү кыйын болуп калды. Ошол себептен өз коопсуздугубузду камсыз кылып, мамлекет башчы айткандай, элибизди коргоо зарыл. Жерибизди бир дагы оккупанттын буту баспагыдай кылыш керек. Президент күч түзүмдөрү менен бир катар жыйындарды өткөрүп, антитеррордук операция режими киргизилди. Айрым кошуна мамлекеттер Беларустун кээ бир жерлерин басып алууга байланышкан чагымчыл иштерди пландап жатканы боюнча маалымат чыкканы чын", — деген Макей.
Ал өлкө башчы күтүүсүз кырдаалдарга даяр туруу үчүн Куралдуу күчтөрдүн даярдыгын текшерип коюуну өтүнгөнүн кошумчалады. Апта башында Путин менен Лукашенко биргелешкен аскердик топ түзүүнү макулдашкан.