БИШКЕК, 12-окт. — Sputnik. 8-октябрдагы Крым көпүрөсүндөгү терактыны Украинанын Коргоо министрлигинин Чалгындоо башкармалыгы уюштурган. Бул иш боюнча Россиянын беш, Украина менен Армениянын үч жараны кармалганын РИА Новости жазды.
"Крым көпүрөсүндөгү терактыны Украинанын Коргоо министрлигинин Чалгындоо башкармалыгы уюштурганы, башында мекеменин жетекчиси Кирилл Буданов турганы аныкталды. Жардыргыч зат билинбегендей кылып жылтырак пленка менен оролуп, жыгач тактайлардын арасына салынган. Ал жүк августтун башында Одессадагы деңиз портунан Болгарияга жөнөтүлгөн", — деп айтылат билдирмеде.
Маалым болгондой, жүктү Болгариядан Поти портуна (Грузия), андан соң Арменияга жөнөтүүгө Украина, Грузия, Армения жарандары тартылган.
Россиянын Федералдык коопсуздук кызматынын маалыматы боюнча, жүк 29-сентябрдан 3-октябрга чейин Еревандагы "Трансальянс" терминалында ЕАЭБдин эрежелерине ылайык бажыдан өтүп, жиберген тарап менен алуучунун документтери өзгөртүлгөн. Шектүү жүк салынган Грузияда катталган DAF үлгүсүндөгү автоунаа 4-октябрда Россия-Грузия чек арасынан өтүп, 6-октябрда Армавир дүң базасына жеткирилип, түшүрүлгөн.
"7-октябрда Соломконун жардамы менен Украина жараны Владимир Злобдун жана Россиянын беш жаранынын документтери кайрадан өзгөртүлгөн. Ошол эле күнү жыгач тактайлар Симферополго бет алган Россиянын жараны Махир Юсубовдун жүк ташуучу автоунаасына жүктөлгөн. 8-октябрда транспорт Крым көпүрөсүнөн өтүп баратканда жардыруу болгон", — деп жазылат маалыматта.
Учурда козголгон кылмыш иштеринин алкагында Россиянын беш жараны, Украина менен Армениянын үч жараны кылмышка даярдык көрүүгө катышкандар катары кармалганы айтылды.
Эске салсак, 8-октябрь күнү таң атпай Крым көпүрөсүнүн бир бөлүгүндө жүк ташуучу автоунаа жардырылып, анын кесепетинен күйүүчү майды темир жол аркылуу ташыган жети цистерна өрттөнгөн. Жарылуунун кесепетинен Краснодар жана Керчь шаарларын бириктирген жолдун бир бөлүгү ураган. Учурда көпүрөдө темир жол, автоунаа кыймылы жанданды. Алдын ала маалыматтар боюнча, кырсыктан жүк ташыган автоунаанын жанында бараткан жеңил машинанын үч жүргүнчүсү көз жумган.
Россия лидери Владимир Путин да жардырууну теракт деп сыпаттап, көпүрөдөгү жардыруу Украинанын атайын кызматынын буйрутмасы менен ишке ашканын белгилеген.