БИШКЕК, 10-окт. — Sputnik. РФ Коопсуздук кеңешинин төрагасынын орун басары Дмитрий Медведев Крым көпүрөсүндөгү жардырууну террордук акт жана диверсия деп атап, аны Киевдин криминалдык режими жасаганын белгиледи.
Медведев донбасстык журналист Надан Фридрихсон менен маек курган. Жоопторду кабарчы Telegram-каналына жарыялаганын РИА Новости жазды.
РФ Коопсуздук кеңешинин төрагасынын орун басары Россия буга террорчуларды жок кылып гана жооп берерин кошумчалаган.
"Бул кылмышка буйрукту Украина бийлиги гана берди. Мындан күмөнүбүз жок. Бардык докладдар жасалып, жыйынтык чыгарылды. Россия буга террорчуларды жок кылуу ыкмасы менен жооп берет. Муну Россиянын бардык жарандары күтүүдө", — деген Медведев.
8-октябрь күнү таң атпай Крым көпүрөсүнүн бир бөлүгүндө жүк ташуучу автоунаа жардырылып, анын кесепетинен күйүүчү майды темир жол аркылуу ташыган жети цистерна өрттөнгөн. Жарылуунун кесепетинен Краснодар жана Керчь шаарларын бириктирген жолдун бир бөлүгү ураган. Учурда көпүрөдө темир жол, автоунаа кыймылы жанданды. Тергөөчүлөр жардырылган автоунаага Краснодар крайынын тургуну ээлик кыларын аныкташты. Алдын ала маалыматтар боюнча, кырсыктан жүк ташыган автоунаанын жанында бараткан жеңил машинанын үч жүргүнчүсү көз жумган.
Россия лидери Владимир Путин да жардырууну теракт деп сыпаттап, көпүрөдөгү жардыруу Украинанын атайын кызматынын буйрутмасы менен ишке ашканын белгиледи.