БИШКЕК, 9-окт. — Sputnik. Президент Садыр Жапаров УКМК төрагасы Камчыбек Ташиевдин Жогорку Кеңешке эки ящик курал алып келгени тууралуу пикирин айтты. Өлкө башчы "Кабар" агенттигине маек берген.
Журналист президенттен "Жогорку Кеңешке УКМК төрагасы Камчыбек Ташиев эки ящик курал алып барган" деген сөздөр коомчулукта кызуу талкуу жаратканын белгилеп, кандай максатта жасалганын сураган. Мындан тышкары, бул окуядан улам "Камчыбек Ташиев менен Талант Мамытов урушуп кетиптир" деген кептин төркүнү тууралуу пикирине кызыккан.
"Депутаттар "Баткен бүтө электе маалымат бергиле" деп чакырышкан экен. "Аскерлердин огу жок экен, автоматтары жетпейт экен" деген сөздөр болуп, "Ташиев эмне кылып жатат, разведкасы иштеген жок" деген сындар болуптур. Анан "мына, силерге автомат" деп алып барса керек. Албетте, парламентте эмес, барам деген депутаттарды алып барып, Баткенден берсе болмок. Бул жагынан кичине ката кетирди. Бирок ошол мезгилде анын акыбалын деле туура түшүнүш керек. Кан кечип жүргөн жеринен түз учуп келди. Анан эмоцияга алдырып койду", — деди Жапаров.
Эске салсак, тажик тарап кол салгандан кийин парламент маселени жабык эшик артында талкуулаган. Төрага баштаган кээ бир депутаттар жыйындан чыгып эле түз Баткенге кетишкен. Кийинчерээк Адахан Мадумаров ал күнү УКМК төрагасы Камчыбек Ташиев ЖКга эки ящик автомат көтөрүп киргенин айткан.