БИШКЕК, 8-окт. — Sputnik. Аялдын организминде темирдин азайышына кайсы факторлор таасир этерин жана анын кесепети кандай болорун лаборатория дарыгери, медицина илимдеринин кандидаты Екатерина Кашух "Известия" басылмасына берген маегинде айтты.
Организмдеги темирди "жеп" салчу учурлар:
этек кирдин көп келиши;
кош бойлуулук;
ачка жүрүү, башкача айтканда, ашынган диета;
ашказан жана ичегидеги жараат (акырындан канай берет).
"Темирдин азайып кетиши жүрөк-кан тамыр системасынын ишин бузуп, кан басымын төмөндөтөт. Булчуңдар алсырап, дене-бой, акыл-эс жакшы өрчүй албай калат. Эс тутум дагы бара-бара начарлайт", — деди дарыгер.
Ошондой эле кишиде анемия илдети өрчүп кетет. Андыктан адис адам жыл ичинде жок дегенде 1-2 жолу кан тапшырып, өз саламаттыгынан кабар алып турушу керектигин эскертти.