БИШКЕК, 7-окт. — Sputnik. Бишкек мэриясы автобус сатып алууда 155 миллион сом зыян келтирген деген Башкы прокуратуранын айыптоосун четке какты.
Прокуратуранын айыптоосу
Мэрияга караштуу "Бишкек автотранспорт" муниципалдык ишканадагылар кызмат абалынан кыянаттык менен пайдаланып, башка компаниялардын катышуусун атайын чектеп, тендер өткөрбөй, буга чейинки сынактардын жыйынтыгын эске албай койгон. 2022-жылдын 15-августунда ZHONGTONG BUS HOLDING CO LTD компаниясы менен бирөө 91 000 доллар болгон 120 автобус алып келүү боюнча келишим түзүшкөн. Жалпы суммасы 10 миллион 920 миң долларды түзгөн. Бул башка компаниялар сунуштаган баадан бир топ жогору.
Натыйжада бажы алымы жана жыйымдарын, ошондой эле импорт салыгын кошкондо бир автобустун баасы 112 339,5 долларды түзүп, келишимдин баасы 1 906 740 долларга же 154 миллион 827,3 миң сомго жогору түзүлгөн.
Кылмыш иши козголуп, тергөө жүрүп жатат.
Мэриянын жообу
2022-жылга карата шаардык бюджеттен майыптыгы бар адамдар үчүн ыңгайлуу, газ менен жүрүүчү заманбап дизайндагы жаңы автобустарды сатып алууга 1 миллиард сом каралган.
17-июнда Бишкек жүргүнчүлөр автотранспорттук ишканасында автобустарды сатып алуу боюнча комиссия түзүлгөн. Анын курамына шаардык кеңештин депутаттары, мэриянын муниципалдык ишканаларынын өкүлдөрү кирген. Эки жолу тендер өтүп (төрт компания катышкан), экөө тең конкурстук документтер жана техникалык тапшырмалар дал келбей жараксыз деп таанылган.
Андан ары эң төмөнкү баа сунуштаган өндүрүүчү менен түз келишим түзүү ыкмасы аркылуу сатып алуу чечими кабыл алынды. Коммерциялык сунуштарды изилдөөнүн жүрүшүндө комиссия Zhongtong Bus Hoiding Co Ltd компаниясын жеңүүчү катары аныктады. Анын автобустары техникалык талаптарга жооп берип, баасы атаандаштарынан 20 пайызга төмөн болгон.
15-августта 120 автобус алып келүү боюнча келишимге кол коюлган. Келишимдин шарттарына ылайык, электрондук банк кепилдиги алынгандан кийин жалпы сумманын 10 пайызын аванс катары которгон.
Тендердин шарты боюнча бардык бажы төлөмдөрү жана салыктары Бишкек жүргүнчүлөр автотранспорттук ишканасы тарабынан төлөнөт. Мындан тышкары, бул автобустар жеңилдетилген категорияга кирип, кошумча нарк салыгы алынбайт. Сынактын шартында алгач 10 пайыздык импорттук алым каралган.
SH.S.S.V. CO LTD сунуштаган автобустардын баасы боюнча арызга ылайык, Башкы прокуратуранын маалыматында көрсөтүлгөн бажы төлөмдөрүн жана салыктарын камтыган эмес, ошондо дагы 96 миң долларды түзгөн. Бул Zhongtong Bus Hoiding Co Ltd тарабынан сунушталган 89 миң доллардан кымбат (тетиктери менен бирге 91 миң доллар болгон).
Келишим боюнча компания автобустарды муниципалдык ишканага чейин алып келип берери кошумчаланды.