29-сентябрдагы шаардык кеңештин сессиясында Бишкек шаарында үйлөнүү үлпөт, үй-бүлөлүк, мааракелик салтанаттарды жана эскерүү иш-чараларын өткөрүүнүн тартиби жөнүндө жобонун долбоору талкууланды. Документтин максаты – социалдык адилеттүүлүктү камсыз кылуу үчүн салттарды жана ырым-жырымдарды иретке келтирүү. Бул тууралуу Максат Үзүров Sputnik Кыргызстан радиосунун эфиринде маек куруп жатып билдирди.
Анын айтымында, жобого ылайык талапты аткарбаган адамдарга эскертүү гана берилет. Бул маселе боюнча мыйзам ишке киргенден соң айып пул салынат.
"Жобого ылайык, үйлөнүү үлпөт тойлорду бир күндүн ичинде 250гө чейин коноктун катышуусунда өткөрүү зарыл. Кортежди төрттөн ашык эмес унаа менен уюштурууга жол берилет. Үй-бүлөлүк майрамдар бир күндүн ичинде 200гө чейинки конок менен өткөрүлөт. Мааракелик салтанаттар 250гө чейин коноктун катышуусунда өтүшү керек. Маркумдардын элесине арналган эскерүү иш-чаралары 300дөн ашпаган адамдын катышуусунда өткөрүлөт. Бардык учурларда бирден ашык бодо мал (жылкы, уй) же үчтөн ашык майда мал союуга болбойт. Ашыкча ысырапкорлуктан алыс болуу сунушталат (таттуулар салынган пакеттерди таратуу, дасторкон жаюу, тамактарды жана кийит алып келүү). Бул маселе көптөн бери көтөрүлүп келе жатат. Мен 2016-жылы Тажикстанга барганда аларда да дал ушундай чектөө бар экен. Бирок аларда бийликте турган адамдары чоң той-аштарды өткөрө берет экен, калк мыйзам чегинде иш алып барганын айтышты. Мындайча айтканда, мыйзамдын ишке ашышы абдан оор экен. Мисалы, биздин райондо мал союучу жайлар жок. Андыктан тойканаларга алып келинген эт жиликтенгенден кийин канча мал союлганын аныктоо кыйын болуп калат. Биз шаардын жашоочуларын жана конокторун бизге колдоо көрсөтүп, жобонун ишке ашышына жардам берүүсүн суранабыз", — деди Үзүров.
Ал учурда муниципалдык аймактык башкаруу, укук коргоо органдары менен биргеликте кафе-ресторандарда түшүндүрүү иштери жүрүп жатканын кошумчалады.