БИШКЕК, 5-окт. — Sputnik. Президент Садыр Жапаров Жамааттык коопсуздук келишим уюмунун (ЖККУ) башкы катчысы Станислав Засты кабыл алды. Бул туурасында мамлекет башчынын маалымат кызматы билдирди.
Жолугушууда регионалдык коопсуздукту жана туруктуулукту камсыз кылуу, ошондой эле уюмдун алкагындагы өз ара иштешүү маселелери боюнча пикир алмашуу болгон.
"Мамлекет башчысы ЖККУнун 30 жылдык мааракелик жылында уюмдун мүчөсү Тажикстандын жакындагы мыйзамсыз жана деструктивдүү аракеттери көлөкө түшүргөнүн өкүнүч менен белгиледи. Ошондой эле Тажикстандын Кыргызстанга каршы куралдуу кол салуусу, анын натыйжасында жай тургундардын жана аскер кызматкерлеринин өлүмү, жарандык жана социалдык инфраструктуранын эбегейсиз кыйрашы тууралуу кеңири айтып берди", — деп жазылат маалыматта.
Өз кезегинде Зась кыргыз-тажик чек арасындагы соңку кайгылуу окуяларга байланыштуу көңүл айткан. Ал эми ЖККУ бул кризистик кырдаалды жөнгө салууга көмөк көрсөтүүгө даяр экенин билдирген.
Мындан сырткары, ал уюмдун Жамааттык коопсуздук кеңешинин бир катар жеке тапшырмаларынын аткарылышы боюнча маалымат берген.