БИШКЕК, 5-окт. — Sputnik. Бишкек мэриясынын кызматкерлери автобус сатып алууда мамлекетке 154,8 миллион сомдук зыян келтиргени аныкталды. Бул тууралуу Башкы прокуратуранын маалымат кызматы билдирди.
Прокуратура кызматкерлери мэрияга караштуу "Бишкек автотранспорт" муниципалдык ишканасын текшерип, ал жакта жүргүнчүлөрдү ташуучу автобустарды сатып алуу боюнча келишим 154 миллион 827,3 миң сомго ашыкча баалоо менен түзүлгөнү аныкталган.
"Муниципалдык ишканадагылар кызмат абалынан кыянаттык менен пайдаланып, башка жеткирүүчүлөрдүн катышуусун атайын чектеп, мыйзамда белгиленген сынакты өткөрбөй, буга чейинки сынактардын жыйынтыгын эске албай 2022-жылдын 15-августунда ZHONGTONG BUS HOLDING CO LTD компаниясы менен бирөөсү 91 000 доллар болгон 120 автобус алып келүү боюнча келишим түзүшкөн. Анын жалпы суммасы 10 миллион 920 миң долларды түзгөн. Бул башка компания сунуштаган баадан бир топ жогору", — деп айтылат маалыматта.
Автобустарды Кыргызстанга жеткирүү жана бажы салыктарын төлөө боюнча келишим дагы кыргыз тарапка пайдасыз болуп калганы айтылды.
"Натыйжада бажы алымы жана жыйымдарын, ошондой эле импорт салыгын кошкондо бир автобустун баасы 112 339,5 долларды түзүп, келишимдин баасы 1 906 740 долларга же 154 миллион 827,3 миң сомго жогору түзүлгөн. Ошондой эле муниципалдык ишкананын жетекчиси Б.Т. башкы бухгалтер жана башка жооптуу адамдар менен макулдашпай, жөнөтүүчү тараптан банктык кепилдикти албастан өзү ZH.B.H. CO LTD компаниясына келишимдик баанын 10 пайызын, башкача айтканда, 1 092 000 доллар бюджеттин акчасын алдын ала которуп жиберген", — деп жазылат маалыматта.
Текшерүүнүн жыйынтыгы менен Бишкек шаардык прокуратурасы тарабынан Кылмыш-жаза кодексинин 337 ("Кызматтык абалынан кыянаттык менен пайдалануу") жана 339-беренелери ("Атайылап пайдасыз келишим түзүү") боюнча кылмыш иши козголуп, тергөө амалдары башталды.