Талаа күнү өтүп, дыйкандарга жүгөрүнүн түшүмүн 2-3 эсе көбөйтүү боюнча мүмкүндүктөр көрсөтүлдү. Бул тууралуу Эрлист Акунбеков Sputnik Кыргызстан радиосуна маек куруп жатып билдирди.
Анын айтымында, аталган иш-чарада дыйкандарга көп түшүм бере турган уруктар сунушталды.
"Жакында жүгөрүнүн "limagrain" уругун өстүрүү боюнча "талаа күнү" өттү. Анда дыйкандарга аталган жүгөрүнүн сортун өстүрүү, түшүмү боюнча кеңири маалымат берилди. Фермерлер жерди даярдоодон баштап, сугаруу, асыроо, жалпы өстүрүү технологиясын сактаганда түшүм кандай болорун көрүштү. Муну менен бирге айыл чарба адистери бири-бири менен пикир алмашып, кызыктырган суроолоруна жооп алышты. Аталган иш-чарада айыл чарба техникасынын көрсөтмөсү уюштурулду. Бул жүгөрүнүн түрү өлкөдө буга чейин деле өстүрүлүп келген. Салыштыруу үчүн алсак, жергиликтүү жүгөрү сорттору гектарынан орточо 50-70 центнер түшүм алынат. Ал эми "limagrain" уругу 170-180 центнерге чейин түшүм бере алат", — деди Акунбеков.
Адис жүгөрүнүн "маями", "пионер" уруктары дагы түшүмдүү болорун кошумчалады.